«Իրավական կրթության և վերականգնողական ծրագրերի իրականացման կենտրոն» պետական ոչ առևտրային կազմակերպությունը (այսուհետ նաև՝ Կազմակերպություն)՝ Արդարադատության նախարարի 2020 թվականի մարտի 12-ի «Սնանկության գործով կառավարչի որակավորման ստուգմանը մասնակցելու համար հավակնորդների ուսուցման կարգը սահմանելու մասին» N 106-Ն հրամանի հավելվածով հաստատված կարգին (այսուհետ նաև՝ ուսուցման կարգ) համապատասխան իրականացնում է՝ սնանկության գործով կառավարչի որակավորման ստուգմանը մասնակցելու համար հավակնորդների ուսուցման դասընթացի ընդունելություն, որի ավարտին դասընթացի մասնակիցներին կշնորհվի վկայագիր՝ հնարավորություն տալով մասնակցելու սնանկության գործով կառավարիչների որակավորման ստուգմանը: 
 Ուսուցման դասընթացներին մասնակցելու համար հավակնորդը Կազմակերպություն է ներկայացնում՝
 1) դիմում, որը լրացվում է Կազմակերպությունում.
 2) անձը հաստատող փաստաթղթի պատճենը (անձը հաստատող փաստաթղթի բնօրինակը պետք է լինի դիմողի մոտ՝ փաստաթղթերը հանձնելու պահին).
 3) կենսագրական տվյալները (ինքնակենսագրական):

 Հավակնորդները վերոնշյալ փաստաթղթերը կարող են ներկայացնել մինչև 2026 թվականի օգոստոսի 4-ը ներառյալ՝ յուրաքանչյուր աշխատանքային օր՝ ժամը 09:30-12:30-ն և 14:30-17:30-ն, Կազմակերպության վարչական շենք՝ ք. Երևան, Մ. Խորենացու 162ա հասցեում:

  Ուսուցման տևողությունը 77 ակադեմիական ժամ է (կից տե՛ս ուսուցման ծրագիրը), իսկ ուսուցման արժեքը կազմում է 180.000 (հարյուր ութսուն հազար) ՀՀ դրամ:
 Ուսուցմանը մասնակցելու հավակնորդի դիմումը մերժվում է, եթե՝
 1) հավակնորդի ներկայացրած փաստաթղթերում առկա են ակնհայտ կեղծ կամ խեղաթյուրված տեղեկություններ.
 2) Հավակնորդը մինչև սույն թվականի օգոստոսի 4-ը ներառյալ չի ներկայացրել ուսուցմանը մասնակցելու համար պահանջվող բոլոր փաստաթղթերը:
 Հավակնորդների ցուցակը կազմելուց հետո՝ Կազմակերպությունը հավակնորդներին լրացուցիչ կտեղեկացնի այն մասին, որ՝
տեղեկացումը ստանալուց հետո տասն աշխատանքային օրվա ընթացքում հավակնորդները պետք է Կազմակերպության հետ ուսուցում անցնելու վերաբերյալ պայմանագիր կնքեն.
պայմանագրի կնքման փուլում հավակնորդը պարտավոր է ուսուցման կարգով նախատեսված պայմաններին համապատասխան վճարում կատարել դասընթացի հայտարարված արժեքի հիսուն տոկոսի չափով.
Պայմանագրի կնքման վերոնշյալ ժամկետի ավարտից հետո՝ հինգ աշխատանքային օրվա ընթացքում, հաշվի առնելով պայմանագիր կնքած բոլոր հավակնորդների ընդհանուր թիվը, Կազմակերպության կողմից կկատարվի դասընթացի արժեքի վերահաշվարկ և յուրաքանչյուր հավակնորդի մասով դասընթացի վերջնական արժեքը որոշելուց հետո հավակնորդները կտեղեկացվեն դասընթացի վերջնական արժեքի, արդեն իսկ վճարված գումարի տարբերության չափով հավելյալ վճարում կատարելու անհրաժեշտության և վճարման չափի մասին.
Կազմակերպության տեղեկացումը ստանալուց հետո՝ հինգ աշխատանքային օրվա ընթացքում, հավակնորդը պարտավոր է Կազմակերպության կողմից տրամադրված գանձապետական հաշվեհամարի վրա կատարել վերոնշյալ հաշվարկված հավելյալ վճարումը՝ վճարման անդորրագիրը ներկայացնելով Կազմակերպություն (տե՛ս ուսուցման կարգի 13-րդ և 13.1-րդ կետերը):
 Ուշադրություն՝ դիմումները ներկայացնելու վերջնաժամկետն է՝ 2026 թվականի օգոստոսի 4-ը ներառյալ:
 Հավակնորդներին տեղեկացնում ենք, որ վերոնշյալ ուսուցման դասընթացները տեղի են ունենալու առկա ձևով, աշխատանքային օրերին, ժամը 18:25-ից հետո՝ ք. Երևան, Վ. Սարգսյան 3/8 հասցեում գտնվող՝ Արդարադատության նախարարության վարչական շենքում (սեպտեմբեր-հոկտեմբեր ամիսներին՝ նախնական տարբերակ):
 Միևնույն ժամանակ անկախ ուսուցումն ավարտելու և համապատասխան վկայագիր ստանալու հանգամանքից՝ հետագայում որպես սնանկության գործով կառավարիչ որակավորվելու համար հավակնորդը պետք է համապատասխանի «Սնանկության մասին» օրենքի 23-րդ հոդվածի 1-ին մասով սահմանված պահանջներին, մասնավորապես՝ 63 տարին լրացած չլինի, ունենա բարձրագույն կրթություն, որակավորման համար դիմելու օրվան նախորդած վերջին հինգ տարվա ընթացքում ունենա իրավաբանական, հաշվապահական կամ այլ տնտեսագիտական գործունեության ոլորտում առնվազն երեք տարվա մասնագիտական աշխատանքային ստաժ, ինչպես նաև Հայաստանի Հանրապետության արդարադատության նախարարի սահմանած կարգով անցած լինի համապատասխան ուսուցում: