ՀՀ արդարադատության նախարարի տեղակալ Սուրեն Քրմոյանը «Տեղեկատվության ազատության մասին» ՀՀ օրենքին և «Տեղեկատվության ազատության ոլորտի արդիականացման» հայեցակարգին վերաբերող աշխատանքային քննարկման շրջանակներում մայիսի 23-ին ընդունել է Գերմանիայի միջազգային համագործակցության ընկերության (GIZ) ներկայացուցիչներին: 

Հիշեցնենք, որ «Տեղեկատվության ազատության մասին» ՀՀ օրենքի հայեցակարգը մշակվում է ԵԱՀԿ երևանյան գրասենյակի աջակցությամբ:

 Նախարարի տեղակալը, շնորհակալություն հայտնելով GIZ-ին ՀՀ օրենսդրության բնագավառում ցուցաբերվող շարունակական աջակցության և սերտ համագործակցության համար, նշել է, որ Արդարադատության նախարարության նպատակը ոլորտում ավելի  կատարյալ օրենսդրական կարգավորումներ ունենալն է: Նա առանձնացրել է մի քանի հիմնախնդիրներ, որոնց շրջանակներում էլ առաջացել է օրենքի կատարելագործման պահանջն ու նախաձեռնվել օրենսդրական փոփոխությունների հայեցակարգի մշակումը: Սուրեն Քրմոյանի խոսքով՝ այդպիսի պահանջներից են տեղեկատվական տեխնոլոգիաների զարգացմանը համահունչ կարգավորումներով օրենք ունենալը, որը կնպաստի նաև թափանցիկության մեծացմանն ու հանդես կգա որպես կոռուպցիայի դեմ պայքարի արդյունավետ միջոց: Անդրադառնալով հայեցակարգով սահմանված դրույթներին՝ նախարարի տեղակալն ընդգծել է, որ նպատակ է դրվել զարգացնելու տեղեկատվության պատասխանատու անձանց ինստիտուտը, խթանելու պրոակտիվ տեղեկատվությունը, ինչպես նաև՝ լուծելու օրենքը խախտելու դեպքում առաջացող պատասխանատվության և հանրային նշանակության տեղեկատվություն ստանալու հետ կապված հարցեր: 

 Գերմանիայի միջազգային համագործակցության ընկերության փորձագետ, պրոֆեսոր Օթթո Լուխթերհադթն աշխատանքային խմբին է ներկայացրել «Տեղեկատվության ազատության մասին» ՀՀ 2003թ. հոկտեմբերի 10-ի օրենքի վերաբերյալ իր փորձագիտական եզրակացությունը: Այնուհետև, մատնանշել է այն սկզբունքները, որոնք, ըստ նրա, ապահովում են տեղեկատվության ազատության ինստիտուտի կենսունակությունը, մասնավորապես՝ տեղեկատվության հասանելիությունը, ամբողջականությունը, հավաստիությունը և արդիականությունը:

 Աշխատանքային խմբի ներկայացուցիչները քննարկել են «Տեղեկատվության ազատության ոլորտի արդիականացման» հայեցակարգով սահմանված դրույթները, ներկայացրել եզրակացություններ և առաջարկություններ:

 Աշխատանքային քննարկումը կշարունակվի մայիսի 24-ին: