Հասարակական կազմակերպությունների կողմից անձնական տվյալների պաշտպանության լիազոր մարմնի ղեկավարի թեկնածություններ ներկայացնելու մասին

Հիմք ընդունելով «Անձնական տվյալների պաշտպանության մասին» օրենքի 25-րդ հոդվածը և ՀՀ կառավարության 2015 թվականի հուլիսի 2-ի N 736-Ն որոշումը՝ Արդարադատության նախարարությունը հայտարարում է հասարակական կազմակերպությունների կողմից արդարադատության նախարարին անձնական տվյալների պաշտպանության լիազոր մարմնի ղեկավարի թեկնածություններ ներկայացնելու գործընթաց սկսելու մասին:
Անձնական տվյալների պաշտպանության լիազոր մարմնի ղեկավարը՝
1) պետք է ունենա բարձրագույն կրթություն, բարձր հեղինակություն և առնվազն հինգ տարվա կառավարման ոլորտի աշխատանքային փորձ.
2) պետք է զերծ մնա իր անկախությունը և անաչառությունը կասկածի տակ դնող գործողություններից:
ՀԿ-ների կողմից առաջարկվող թեկնածուների ցուցակը (այսուհետ՝ ցուցակ) հաստատվում է իրավապաշտպան գործունեություն իրականացնող առնվազն հինգ հասարակական կազմակերպության համատեղ արձանագրությամբ (այսուհետ՝ արձանագրություն), թեկնածուի գրավոր համաձայնության հիման վրա: Արձանագրությամբ ՀԿ-ներն իրենց կազմից ընտրում են փաստաթղթերը ներկայացնող հասարակական կազմակերպությունը:
Ցուցակին ներկայացվող պարտադիր պահանջներն են՝ 
1)    ցուցակում ընդգրկված յուրաքանչյուր թեկնածուի վերաբերյալ թեկնածուի կենսագրական տվյալների ներկայացում,
2)    տեղեկատվություն՝ թեկնածուի կրթության և հետբուհական աշխատանքային գործունեության մասին:
Արձանագրության բնօրինակը ցուցակում ընդգրկված անձի գրավոր համաձայնությունը, ինչպես նաև յուրաքանչյուր թեկնածուի կենսագրական տվյալները, կրթության և հետբուհական աշխատանքային գործունեության վերաբերյալ փաստաթղթերը ՀԿ-ները (նրանց կազմից ընդգրկված հասարակական կազմակերպությունը) գրավոր դիմումով ներկայացնում է Արդարադատության նախարարության աշխատակազմ՝ առձեռն, փոստով (ք. Երևան, Վազգեն Սարգսյան 3/8) կամ էլեկտրոնային եղանակով (էլ. փոստի հասցե՝ naira.sedrakyan@justice.am):
Փաստաթղթերի ներկայացման վերջնաժամկետն է 2026 թվականի ապրիլի          2-ը, ժամը 18.00-ը:
ՀԿ-ների կողմից թերի կամ ոչ ամբողջական փաստաթղթերի ներկայացման դեպքում նախարարության աշխատակազմն առաջարկում է երկօրյա ժամկետում շտկել թերությունները։
Փաստաթղթերի ներկայացման վերջնաժամկետի ավարտից հետո Արդարադատության նախարարության աշխատակազմը ՀԿ-ների կողմից ներկայացված ցուցակը, թեկնածուների կենսագրական, կրթության և հետբուհական աշխատանքային գործունեության, ինչպես նաև առաջադրած հասարակական կազմակերպությունների մասին տեղեկատվությունը հրապարակվում է նախարարության պաշտոնական ինտերնետ կայքում:
Ցուցակի հրապարակումից հետո ոչ ուշ, քան մեկշաբաթյա ժամկետում թեկնածություն ներկայացրած հասարակական կազմակերպություններն իրավունք ունեն գրավոր դիմումով նախարարություն ներկայացնելու այլ ցանկացած փաստաթուղթ, որը կարող է հավաստել թեկնածուների մասնագիտական փորձառությունը և նպաստել լիազոր մարմնի ղեկավարի պաշտոնում արդյունավետ գործելու համար անհրաժեշտ որակների ու արժանիքների բացահայտմանը:
Հարցերի դեպքում զանգահարել՝ 010-59-40-09 հեռախոսահամարով: